Mál knattspyrnumannsins Gylfa Þórs Sigurðssonar er enn á borði saksóknaraembættis bresku krúnunnar.
Þetta kom fram í skriflegu svari embættisins við fyrirspurn Fréttablaðsins en Gylfi Þór, sem er 33 ára gamall, var handtekinn í júlí sumarið 2021 fyrir brot gegn ólögráða einstaklingi.
Í febrúar á þessu ári bárust fréttir af því að leikmaðurinn væri sakaður um ítrekuð kynferðisbrot og að málið væri komið inn á borð saksóknarembættisins.
„Það eru engar nýjar vendingar í þessu máli,“ sagði í svari embættisins við fyrirspurn Fréttablaðsins.
„Við getum ekki komið með nákvæman tímaramma á því hvenær ákvörðun verður tekin,“ segir enn fremur í svari embættisins.
Gylfi Þór, sem er 33 ára gamall, hefur verið laus gegn tryggingu allt frá því að hann var handtekinn þann 16. júlí.
Hefur það fyrirkomulag verið framlengt nokkrum sinnum en hann hefur verið í farbanni frá því í júlí 2021.