Í fyrsta skipti í sex ár verður úrslitaleikurinn í Meistaradeild Evrópu spilaður með hvorki Lionel Messi né Cristiano Ronaldo inni á vellinum.
Þessir tveir bestu fótboltamenn sögunnar hafa lokið keppni í Meistaradeildinni. Ronaldo féll úr leik í átta liða úrslitunum með Juventus þegar liðið tapaði fyrir Ajax og Messi og félagar hans í Barcelona voru skotnir út úr keppninni í undanúrslitunum á Anfield í gær af Liverpool.
Þetta er í fyrsta skipti síðan árið 2013 sem hvorki Ronaldo né Messi spila úrslitaleikinn en þá mættust Bayern München og Borussia Dortmund, undir stjórn Jürgens Klopp núverandi stjóra Liverpool, í úrslitaleiknum þar sem Arjen Robben tryggði Bayern sigurinn.
Klopp tapaði úrslitaleiknum í Meistaradeildinni í fyrra þegar Liverppol beið lægri hlut fyrir Real Madrid en nú vonast Þjóðverjinn eftir því að honum takist að landa stóra titlinum í þriðju tilraun.