Hákon Daði Styrmisson átti hreint lygilegan leik fyrir Hagen þegar liðið lagði Lübeck-Schwartau örugglega að velli, 38:31, í þýsku B-deildinni í handknattleik karla í kvöld.
Hákon Daði gerði sér lítið fyrir og skoraði 17 mörk fyrir Hagen. Mörkin 17 skoraði hann úr 20 skottilraunum og var því með 85 prósent skotnýtingu.
Eyjamaðurinn er í góðu formi um þessar mundir enda skoraði hann tíu mörk í sigri á Dormagen í deildinni í síðustu viku.
Örn Vésteinsson komst ekki á blað í liði Lübeck-Schwartau.
Hagen er í fjórða sæti B-deildarinnar með 34 stig, sex stigum á eftir Bietigheim í öðru sæti, en tvö efstu liðin fara beint upp í 1. deild.
Lübeck-Schwartau er í níunda sæti með 25 stig.