Damian Lillard var stigahæstur hjá Milwaukee Bucks þegar liðið hafði betur gegn Indiana Pacers í fyrsta leik liðanna í 1. umferð úrslitakeppni NBA-deildarinnar í körfuknattleik í Milwaukee í nótt.
Leiknum lauk með nokkuð öruggum sigri Milwaukee, 109:94, en Lillard skoraði 35 stig, tók sex fráköst og gaf þrjár stoðsendingar í leiknum.
Þá skoraði Shai Gilgeous-Alexander 28 stig fyrir Oklahoma City, ásamt því að taka sex fráköst og gefa fjórar stoðsendingar, í 94:92-sigri liðsins gegn New Orleans í fyrsta leik liðanna í Oklahoma.
Vinna þarf fjóra leiki til þess að tryggja sér sæti í 2. umferð úrslitakeppninnar en Milwaukee og Indiana mætast næst í Milwaukee, á miðvikudaginn, og Oklahoma og New Orleans í Oklahoma á fimmtudaginn.