Héraðdómur Reykjavíkur vísaði í dag frá dómi máli sem karlmaður höfðaði á hendur Hraðpeningum ehf. og eiganda fyrirtækisins, Skorra Rafni Rafnssyni. Stefnandi krafðist þess að viðurkennt yrði með dómi að hann sé eigandi að hlutafé í félaginu Hraðpeningum ehf. að fjárhæð 500 þúsund. Stefndu kröfðust þess aftur á móti að málinu yrði vísað frá dómi.

Í dómi héraðsdóms Reykjavíkur kemur fram að samkvæmt tilkynningu um stofnun Hraðpeninga ehf., sem móttekin var hjá fyrirtækjaskrá ríkisskattstjóra þann 17. desember 2009, var félagið stofnað 16. sama mánaðar og voru stofnendur og stjórnarmenn sagðir vera Gísli Rúnar Rafnsson, Skorri Rafn og Sverrir Einar Eiríksson sem er stefnandi í málinu. Hver þeirra átti samkvæmt tilkynnigu 33,333% hlut í félaginu.

Með tilkynningu til fyrirtækjaskrárinnar, sem dagsett er 6. janúar 2010, og móttekin daginn eftir, er upplýst að samkvæmt fundi í félaginu þann dag skuli stjórn þess þannig skipuð að formaður stjórnar og eini stjórnarmaður verði Skorri Rafn. Undir tilkynninguna rita allir ofangreindir stofnendur félagsins.

Samkvæmt ársreikningum Hrraðpeninga fyrir 2009 og 2010 er Skorri Rafn sagður eigandi alls hlutafjár í félaginu en samkvæmt ársreikningi ársins 2011 er erlent félag með heitið Jumdon Micro Finance Ltd., með heimili á Kýpur, sagt eigandi að öllu hlutafé í félaginu.

Héraðsdómur Reykjavíkur ákvað að vísa málinu frá dómi í ljósi þess að þar sem Jumdon Micro Finance Ltd. er skráður eigandi að öllu hlutafé Hraðpeninga ehf. og því hefði Sverrir Einar einnig átt að stefna fyrrnefnda félaginu. 

Stefnanda, Sverri Einari, var einnig gert að greiða bæði Skorra Rafni og Hraðpeningum ehf. 200 þúsund krónur vegna málskostnaðar.

Tengdar fréttir

Smálánafyrirtæki

„Við tölum ekki nógu mikið um hákarla“

• Innheimtuhættir aðfinnsluverðir
• Smálánaskuldir aftur skráðar hjá Creditinfo
• Á pari við innheimtu fíkniefnaskulda
• Vilja stöðva smálánafyrirtæki

» Fleiri tengdar fréttir

• Blogga um frétt