Viðskipti | AFP | 5.11.2018 | 12:22

„Viðskiptastríð það heimskulegasta í heimi“

Bill Gates sést hér við hlið Jack Ma á kaupstefnunni í morgun. AFP

„Viðskiptastríð Bandaríkjanna og Kína er það heimskulegasta í heimi,“ segir Jack Ma, stofnandi vefverslunarinnar Alibaba. Ummælin lét Ma falla á viðskiptakaupstefnu í Kína í dag.

Frétt af mbl.is

Kínverski draumurinn holdi klæddur

Ma, sem nýlega dró til baka ákvörðun um að aðstoða bandarísk fyrirtæki við að skapa yfir milljón störf í Bandaríkjunum, segist hafa hætt við samstarfið vegna viðskiptastríðsins sem Donald Trump, forseti Bandaríkjanna, hóf fyrr á árinu.

Ma segir að viðskipti séu ákveðið form friðar. Viðskipti séu samskipti og að enginn geti stöðvað frjáls viðskipti.

Forseti Kína, Xi Jinping, flutti opnunarávarp kaupstefnunnar í Peking í morgun en stjórnvöld í Kína vonast til þess að með kaupstefnunni verði hægt að laða að fleiri fjárfesta.

Jack Ma. AFP

Ma vakti heimsathygli þegar hann hét Trump því í fyrra að styðja við bakið á bandarískum fyrirtækjum við að skapa milljón störf en á þessum tíma ríkti mikill velvilji í garð Trumps hjá kínverskum yfirvöldum. En í september greindi Xinhua-fréttastofan frá því að viðskiptastríðið hafi eyðilagt forsendurnar sem loforðið byggði á.

Ma, sem tilkynnti í september að hann ætlaði að láta af störfum sem forstjóri eftir ár, ætlar að einbeita sér að mannúðarmálum þegar hann lætur af störfum.