Viðskipti | Morgunblaðið | 14.4.2023 | 10:46

Ljósleiðarinn verði einkavæddur að hluta

Þórdís Lóa Þórhallsdóttir, Einar Þorsteinsson og Dagur B. Eggertsson sátu öll í stýrihópnum sem nú leggur til að Ljósleiðarinn verði einkavæddur að hluta. mbl.is/Kristinn Magnússon

Rýnihópur borgarráðs hefur fallist á að Ljósleiðarinn, dótturfélag Orkuveitu Reykjavíkur (OR), verði einkavæddur að hluta til með allt að 11 milljarða króna hlutafjáraukningu.

Þetta kemur fram í umsögn rýnihópsins sem lögð var fram í borgarráði í gær. Einnig kemur fram að stjórn OR sé tilbúin að leggja félaginu til aukið fjármagn samhliða hlutafjárkaupum þriðja aðila.

Frétt af mbl.is

Svara ekki til um fjármögnun Ljósleiðarans

Rýnihópurinn var skipaður á síðasta ári eftir að Ljósleiðarinn hafði gengið til samninga um kaup á grunnneti Sýnar fyrir um þrjá milljarða króna. Þá var orðið ljóst að félagið myndi þurfa á auknu fjármagni að halda en ráðist var í dýra lántöku til að fjármagna kaupin. Fram kemur í umsögn rýnihópsins að Ljósleiðarinn hafi meinað hópnum aðang að samningi félagsins við Sýn.

Frétt af mbl.is

Vill ekki svara efnislegum spurningum um starfsemi Ljósleiðarans

Spurður um það hvort Ljósleiðarinn hafi átt í samskiptum við fjárfesta um mögulega aðkomu þeirra að félaginu segir Erling Freyr Guðmundsson, framkvæmdastjóri Ljósleiðarans, að margir áhugasamir aðilar hafi haft samband en að jákvæð afgreiðsla eigenda sé forsenda þess að umboð fáist til viðræðna af hálfu félagsins.

Einar Þorsteinsson, formaður borgarráðs, hefur ekki svarað fyrirspurn Morgunblaðsins um störf hópsins.