Boeing tapar 50 milljörðum á þremur mánuðum

Bandaríski flugvélaframleiðandinn Boeing tapaði 343 milljónum Bandaríkjadala, eða tæplega 50 milljörðum króna, á fyrsta ársfjórðungi þessa árs. Þetta er þó minna tap en félagið skilaði á sama tíma í fyrra þegar það tapaði 414 milljónum dala.

Uppgjörið litast af öryggisvandræðum sem hafa plagað fyrirtækið á undanförnum misserum og árum, en þau hafa tafið framleiðslu og afhendingu á flugvélum félagsins.

Boeing segist hafa hægt á framleiðsluferli á Boeing 737 þotum eftir atvik í vél Alaska Airlines í janúar, en litlu mátti muna að þá hefði orðið stórslys þegar hurðarlok losnaði í miðju flugi með þeim afleiðingum að ýmsir munir um borð í vélinni soguðust út. Ekkert manntjón varð þó þar sem fólk var með sætisólar spenntar og hélst í sætum sínum.

Rekstur Boeing hefur verið í járnum undanfarin ár eftir ítrekuð vandamál sem tengjast vélum félagsins. AFP/Kevin Dietsch

Tekjur félagsins á fyrsta ársfjórðungi námu 16,6 milljörðum dala, eða um 2.400 milljörðum króna. Er það samdráttur um 7,5% milli ára.

Sá hluti Boeing sem framleiðir farþegaflugvélar olli talsverðu tapi í uppgjörinu og var meðal annars vísað til umhugsunar viðskiptavina félagsins þegar kemur að kaupum á nýjum vélum í kjölfarið á því að Boeing 737 MAX 9 vélar félagsins voru kyrrsettar eftir tvö mannskæð flugslys.

Varnarmáladeild fyrirtækisins skilaði hins vegar rekstrarhagnaði.

Haft er eftir Dave Calhoun, forstjóra félagsins, að uppgjörið sýni fram á aðgerðir sem félagið hafi ráðist í til að hægja á framleiðslunni til að bæta gæði í framleiðslu. Segir hann að þessi aukni framleiðslutími muni styrkja félagið til lengri tíma.

• Blogga um frétt