„Mér líður ágætlega,“ sagði Valsmaðurinn Tjörvi Týr Gíslason í samtali við mbl.is eftir sigur Vals á Olympiacos frá Grikklandi í fyrri leik liðanna í úrslitum Evrópubikarsins í handbolta. Urðu lokatölur 30:26 og Valur fer með fjögurra marka forskot til Aþenu.
„Þetta er ekki búið en þetta var gaman og geggjuð stemning í höllinni. Það gerist ekki betra en að spila fyrir fulla höll á Hlíðarenda. Það er alltaf frábært að spila svona leiki, þótt maður sé orðinn vanur þessu. Það er frábært fyrir uppalinn Valsara að upplifa þetta.“
Olympiacos-liðið er sterkt, með stóra og stæðilega leikmenn en Valsliðið spilaði mjög vel. „Mér finnst geggjað að spila á móti svona liði. Þeir eru stærri, þyngri og betri skotmenn. Við náðum að spila vel á þá.“
Ljóst er að Valsliðinu bíður ærið verkefni á mjög erfiðum útivelli gríska stórliðsins.
„Þetta verður erfitt úti en það leggst mjög vel í mig og ég er spenntur. Vonandi fáum við alvöru stemningu úti og við verðum að njóta. Það getur allt gerst úti og við verðum að vera yfirvegaðir,“ sagði Tjörvi.