Körfuboltakonan Helena Sverrisdóttir verður tekin inn í frægðarhöll Texas Christian University í haust. Háskólinn tilkynnti fregnirnar á heimasíðu sinni.
Helena lék fyrir háskólaliðið í fjögur tímabil árin 2007 til 2011 og hélt í atvinnumennsku í kjölfarið. Áður hafði hún orðið Íslandsmeistari í tvígang með Haukum.
Helena er stoðsendingahæsti leikmaður í sögu skólans, fjórða stigahæst og í fimmta sæti yfir flesta stolna bolta.
4. október næstkomandi verður Helena heiðruð ásamt öðrum nýjum meðlimum frægðarhallarinnar en þetta þykir mikill heiður í bandarískum íþróttum.