Microsoft mun verja fjórum milljörðum evra, eða því sem nemur tæpum 604 milljörðum íslenskra króna, í fjárfestingu til að þróa gagnaver í Frakklandi.
Frá þessu er greint í tilkynningu fyrirtækisins frá því í dag.
Auk Microsoft hefur bandaríska fyrirtækið Amazon einnig tilkynnt um að það skuldbindi sig til að fjárfesta í tækniiðnaði í Frakklandi.
Tilkynningarnar berast í aðdraganda fundarins „Choose France“ sem fer fram á morgun. Er viðburðurinn til þess gerður að laða erlenda fjárfesta til landsins.
Brad Smith, stjórnarformaður Microsoft, segir fjárfestinguna vera stærstu fjárfestingu tæknirisans í Frakklandi frá upphafi. Segir hann langvarandi skuldbindingar Frakklands við kolefnislausa orkumarkaði og staða þess sem mikilvægur leiðtogi í Evrópu skýra ákvörðunina.
Nýja gagnaverið verður í austurhluta Frakklands en núverandi gagnaver í París og í Marseille verða stækkuð.
Amazon mun fjárfesta fyrir meira en 1,2 milljarða evra (181 milljarð króna) í Frakklandi og skapa með því rúmlega 3.000 störf, að því er segir í tilkynningu frá embætti forseta Frakklands.