Skjálftavirkni í kvikuganginum við Svartsengi hefur verið svipuð í nótt og undanfarna daga og landris heldur áfram.
Jóhanna Malen Skúladóttir, náttúruvársérfræðingur á Veðurstofu Íslands, segir í kringum 60 jarðskjálfta hafa orðið í kvikuganginum síðasta sólarhringinn. Undanfarið hafa skjálftarnir verið um 40 til 80 á dag.
„Það hefur verið ágætis virkni í nótt en ekki meira en undanfarna daga,” segir Jóhanna Malen. „Við bíðum eftir að eitthvað gerist en það er ekki hægt að segja neitt um hvenær það verður.”