Lentu í arfavitlausu veðri

„Við vorum að veiðum suðaustarlega í Smugunni um 340 mílur frá Norðfirði. Það gafst heldur lítill tími til veiða vegna veðurs. Það brældi og gerði í reynd arfavitlaust veður þannig að það var ekkert annað að gera en að halda í land,“ segir Tómas Kárason, skipstjóri á Beiti NK.

Skipið er nýkomið til hafnar í Neskaupstað með rúmlega 900 tonn af norsk-íslenskri síld en aflinn fékkst í fjórum holum.

Börkur NK er að veiðum í færeysku lögsögunni og Bjarni Ólafsson AK kom til Neskaupstaðar í nótt eftir að hafa verið í slipp á Akureyri.

Runólfur Runólfsson skipstjóri segir að farið hafi fram svonefnd 20 ára skoðun á skipinu.

„Vélin var tekin upp, skipið þykktarmælt, farið yfir rafkerfið og fleira. Síðan var skrokkurinn málaður og skipið er voða fínt núna.“

• Blogga um frétt