„Það var bræla hérna í tvo daga“

Sjö íslensk skip eru nú á kolmunnaveiðum austur af Færeyjum. Tómas Kárason, skipstjóri nóta- og togveiðiskipsins Beitis NK, segir heldur rólegt vera á miðunum. „Það var bræla hérna í tvo daga og svo er fínt veður núna. Við erum bara á fyrsta holi,“ segir hann.

Framan af hefur kolmunnaveiði gengið þokkalega og landaði Beitir 3.100 tonnum úr færeysku lögsögunni í Neskaupstað á mánudag.

Frétt af mbl.is

Beitir með 3.100 tonn af kolmunna

Tómas Kárason, skipstjóri Beitis NK. Ljósmynd/Þorgeir Baldursson

„Hún var ágæt fyrir brælu. Búið að vera svakalega rólegt síðan í gær,“ svarar skipstjórinn spurður hvernig veiðin gengur nú. Hann segist ekki geta sagt til um hversu langur túrinn verði að þessu sinni enda velti það á hvernig veiðum miðar. „En maður veit aldrei. Það fer kannski eitthvað að gefa. Allavega fer rólegt af stað eftir bræluna,“ bætir Tómas við og segir jafnframt mörg skip á svæðinu.

Íslensku skipin sem nú eru á sama svæði og Beitir eru Huginn VE-055, Víkingur AK-100, Margrét EA-710, Jón Kjartansson SU-111, Venus NS-150 og Bjarni Ólafsson AK-070.

Fram kemur á vef Síldarvinnslunnar að skip fyrirtækisins hafi hafið kolmunnaveiðar í færeysku lögsögunni í síðasta mánuði og að Bjarni Ólafsson og Beitir þegar hafa landað fyrstu förmunum í Neskaupstað. Þá hafi þegar verið landað um 5 þúsusund tonnum og var Börkur NK á leið til hafnar í gær með tvö þúsund tonn.

• Blogga um frétt