Þurfa heimild Vegagerðar til að flytja kranana

Tryggingafélag Hagtaks ehf. og Köfunarþjónustan hefur komist að samkomulagi um hífingu dýpkunarprammans sem sökk í Rifshöfn á Snæfellsnesi í gær. „Þeir eru bara að græja sig í að koma vestur,“ segir Björn Arnaldsson, hafnarstjóri Snæfellsbæjar, í samtali við 200 mílur.

„Þeir stefna að því að ná gröfunni af prammanum og hífa hana upp á bryggju,“ segir Björn. Óvíst er þó nákvæmlega hvenær sé hægt að hefjast handa þar sem beðið er eftir heimild frá Vegagerðinni fyrir flutningi á tveimur krönum á Rif. Mikið verk er að flytja krana af þeirri stærð sem þarf í verkið enda vegur grafan á prammanum um 70 tonn.

Frétt af mbl.is

Dýpkunarprammi sekkur á Rifi

„Það er engin sjáanleg olíumengun. Olíutankarnir tveir, á prammanum og á gröfunni, eru upp úr sjó og meðan að það er lítur þetta vel út. Þetta hallar en hann er óbreyttur frá því í gærdag,“ útskýrir Björn. Hann segir engu að síður sé mengunarvarnarbúnaður sem drekkur í sig olíu enn í sjónum til öryggis.

Pramminn er í eigu Hagtaks. Hann var byggður í Hollandi 1995, er af gerðinni Confloat og ber nafnið Svavar. Hann er settur saman af níu einingum sem boltaðar eru saman. Um borð eru vinnuskúrar, geymslur og díselrafstöð, auk 70 tonna gröfu.

• Blogga um frétt