„Við sluppum þokkalega“
Setja bókamerki
Ekki hafa orðið miklar skemmdir á eignum eða slys á fólki hjá Eskju og Síldarvinnslunni í ofsaveðrinu. Þó truflaði framleiðslu að rafmagnið hafi farið af Austurlandi.
„Við sluppum þokkalega og engar umtalsverðar skemmdir,“ segir Páll Snorrason, framkvæmdastjóri sjávarútvegsfyrirtækisins Eskju á Eskifirði, er hann er spurður um hvaða áhrif ofsaveðrið hefur haft á reksturinn.
„Við lentum í brasi með gamla skipið okkar, Jón Kjartansson SU 311, sem liggur á Reyðarfirði. Hann var að losna frá bryggjunni […] en það slapp til og fór betur en á horfðist. Við erum ekki að nota þetta skip. Það er komið til ára sinna og er til sölu,“ útskýrir Páll.
„Það er ekkert alvarlegt tjón hjá okkur enn sem komið er,“ segir Gunnþór Ingvason, framkvæmdastjóri Síldarvinnslunnar á Neskaupstað. „Við vorum að framleiða bæði í frystihúsinu og fiskimjölsverksmiðjunni í gær þegar rafmagnið datt út. Það raskaði lítillega hjá okkur vinnslum en allt er komið í gang núna.“
Þá fuku nokkur fiskikör hjá frystihúsi félagsins á Seyðisfirði, en ekki urðu miklar skemmdir á eignum eða slys á fólki. „Heilt yfir höfum við sloppið ágætlega enn sem komið er,“ segir Gunnþór.
Hefja síldveiði í kvöld eða nótt
Síldarvertíðin var hafin þegar veðurofsinn skall á og létu uppsjávarskipin sig hverfa enda voru slæm skilyrði til veiða á síldarmiðunum. Sjólagsspá Vegagerðarinnar gerir ráð fyrir áframhaldandi mikilli ölduhæð fram eftir degi en staðan á að batna í kvöld og í nótt.
„Varðandi síldina þá fara okkar skip út í dag eða kvöld eða þegar veðrið lagast. Við eigum eftir að veiða og vinna um 4.000 tonn af okkar heimildum í norski-íslensku síldinni. Okkur hefur gengið mjög vel að ná síldinni en hún er nálægt og veiðin búin að ganga vel,“ segir Páll.
Pútín leggur óvæntan ráðherrakapal
Hvetja konur til að hætta notkun getnaðarvarna
Kappræður setja strik í reikninginn
Eftir stóð sálin og hreinleikinn
Eldgos eða kvikuinnskot yfirvofandi
Keppanda aldrei verið vísað úr keppni áður
Stjórnvöld brjóti gegn alþjóðlegum skuldbindingum
Sviss vann Eurovision