Brim hf., Fiskvinnslan Kambur ehf. og Vélfag ehf. skrifuðu í dag undir samning á Sjávarútvegsráðstefnunni um kaup á fyrstu UNO vélinni á Íslandi, en vélin verður sett upp í vinnsluhúsnæði Fiskvinnslunnar Kambs í Hafnarfirði.

Samkvæmt samkomulagi fyrirtækjanna hefur Brim tryggt sér forkaupsrétt á fimm UNO-vélum sem framleiddar verða, en um er að ræða eina helstu nýjung í fiskvinnslu á heimsvísu, að því er fram kemur í fréttatilkynningu.

UNO er fiskvinnsluvél sem tekur við slægum fiski og sér hún síðan um að flaka, skera út beingarð,og roðrífa án utanaðkomandi aðstoðar og skilar frá sér flökum, tilbúin í snyrtingu, ásamt aukaafurðum. Vélin er afrakstur nokkurra ára þróunarstarfs Vélfags en hún var kynnt til leiks á síðasta ári.

Framtíð sjávarútvegsins

„Þetta er framtíðin fyrir íslenskan sjávarútveg, sjálfvirkni sem fækkar höndum og eykur gæði, hraða og afköst. Við erum gríðarlega ánægð með þennan samning og að vera fyrsta íslenska fyrirtækið til að innleiða þessa tækni og þar af leiðandi að styðja við tækniframfarir í sjávarútvegi“,segir Hólmar Jóhann Hinriksson, framkvæmdastjóri Fiskvinnslunnar Kambs.

Gert er ráð fyrir að Fiskvinnslan Kambur fái vélina afhenda í fyrri hluta árs 2024.

„Þetta er stór áfangi fyrir Vélfag og mikil viðurkenning að Brim fjárfesti í UNO ásamt forkaupsrétt af fimm UNO vélum til viðbótar. Við finnum við fyrir gríðarlegum áhuga og eftirvæntingu á markaðnum fyrir þessari lausn og kemur vélin til með að gjörbylta hvítfiskvinnslu og er ein mesta framþróun í vinnslutækni síðari ára, algjör leikbreytir„ segir Ragnar Guðmundsson, sölustjóri Vélfags.

Tengdar fréttir

Nýsköpun og tækni í sjávarútvegi

Hugmyndafræði Sjávarklasans víða eftirsótt

• Rétt hugarfar hafi átt áhrif á heimsvísu
• Árangur Íslands skólabókardæmi um fullnýtingu
• Vinnslur gætu framleitt eigin sótthreinsiefni úr sjó
• Sjávarútvegurinn er drifinn áfram af gögnum

» Fleiri tengdar fréttir

• Blogga um frétt