Ánægður með fyrstu flökunarvél sinnar tegundar

Fiskvinnslan Íslandssaga á Suðureyri var meðal fyrstu fyrirtækjanna til að taka í notkun flökunarvél af gerðinni Baader 189Pro og hefur hún reynst mjög vel að sögn Óðins Gestssonar, framkvæmdastjóra fyrirtækisins.

Þetta kemur fram í fréttatilkynningu frá Baader Íslandi.

Fram kemur að vélin var tekin í notkun um mitt síðasta ár en hún er afrakstur mikillar þróunarvinnu starfsmanna Baader Ísland í nánu samstarfi við helstu viðskiptavini fyrirtækisins auk þess var vélin framleidd á Íslandi.

Greint er frá því að miklar væntingar hafa verið gerðar til vélarinnar ekki síst vegna þess að henni er ætlað að koma í stað og ná betri árangri en fyrirrennarinn Baader 189 sem sögð er hafa verið burðarás í fiskiðnaði um allan heim í áratugi.

„Við höfum langa og góða reynslu af Baader 189 vélinni og var okkar starfsfólk því mjög spennt að sjá hvort sú nýja tæki henni fram á jafn mörgum sviðum og stefnt var að. Eftir nokkurra mánaða notkun hinnar nýju vélar eru okkur ljóst að allar helstu væntingar hafa staðist og gott betur“ segir Óðinn.

Íslandssaga hf. rekur fiskverkun á Suðureyri. mbl.is/Sigurður Bogi Sævarsson

Tölvustýring bætir nýtingu

Sérstakt markmið í  þróunarferlinu var að sjá til þess að tölvustýrðir mótorar vélarinnar tryggðu að hnífar kæmust nær beinum og gæfu því enn betri nýtingu en hjá eldri vélum. Auk þess er öllum breytingum á milli fiskstærða og tegunda nú stýrt á einfaldan hátt frá tölvuskjá vélarinnar. Þá var hönnun alls ytri búnaðar miðuð við hámarksöryggi við notkun vélarinnar og til að auðvelda þrif og viðhald auk þess sem vélin eru öll úr ryðfríu stáli.

„Við verkum fisk fyrir mjög kröfuharða kaupendur og því afar mikilvægt að tryggja jöfn og umfram allt,  góð gæði. Við höfum því í gegnum tíðina veðjað á framleiðslu og þjónustu Baader til þess að standast miklar  og síauknar kröfur okkar kaupenda en tryggja jafnframt að bætt nýting skapi betri afkomu í vinnslunni. Ég er sannfærður um að við séum ekki að tjalda til einnar nætur með kaupum á Baader 189Pro heldur tryggja enn betur stöðugleika í framleiðslunni til lengri tíma“ segir Óðinn.

Karl Ásgeirsson viðskiptastjóri Baader á Íslandi segir í tilkynningunni góðan árangur nýju vélarinnar ánægjulega staðfestingu á því mati Baader á sínum tíma að þróun og smíði vinnsluvéla fyrirtækisins fyrir hvítfisk væri best komin í höndum starfsmanna Baader á Íslandi. Þróun vélarinnar hafi því farið fram í nálægð og nánu samstarfi við fiskverkendur og viðskiptavini Baader til áratuga. Það samstarf hafi tekist vonum framar.     

Nýja flökunarvélin verður til sýnis á bás Baader á sjávarútvegssýningunni í Barcelona síðar í þessum mánuði.

• Blogga um frétt