Jesko Absolut nær 530 km hraða

Sænski bílsmiðurinn Koenigsegg ætlaði að frumsýna tvo ofurhraðskreiða bíla á sýningunni í Genf sem blásin var af nokkrum dögum fyrir opnun vegna útbreiðslu kórónuveirunnar.

Gripið var til netsins í staðinn til að koma á framfæri myndum og upplýsingum um bílana öflugu, Jesko Absolut og Gemera. Sýnt þykir að sá fyrrnefndi muni eltast við hraðaheimsmet hvers konar, sem nú eru í eigu McLaren F1 sportbílsins og Bugatti Veyron. Ætti hann að hafa góða burði til þess því uppgefinn hámarkshraði er 530 km/klst.

Öryggi verður þó að vera í fyrirrúmi að sögn forstjórans Christian von Koenigsegg. Absolut er hraðskreiðasti bíll sem fyrirtækið hefur nokkru sinni smíðað – og aldrei myndi það smíða fljótari bíl.

Jesko Absolut verður þó ekki einráður því heimildir herma að Bugatti hinn franski ætli að gera enn betur með nýjum Chiron Super Sport.

Hver er svo geta Jesko Absolut? Forstjórinn hefur sagst munu freista þess í fyrstu lotu að ná 500 km/klst. metinu. Í viðtali segist hann hafa vanmetið getu bílsins, sem nú er uppgefinn með 530 km hámarkshraða, 329 mílna, en þykir jafnvel búa yfir eiginleikum til að komast enn hraðar. agas@mbl.is