„Brimborg kynnir í dag, föstudaginn 11. júní, í Citroën salnum á Bíldshöfða krúttlega rafsnattann Citroën AMI sem er sannkölluð bylting til snatts innan borga og bæja og smellpassar við aðra ferðakosti.“
Þannig segir í tilkynningu frá Brimborg um nýjan tveggja manna, fjórhjóla, rafdrifinn, yfirbyggðan smábíl eða með öðrum orðum rafsnatta. Er hann hugsaður til stuttra snúninga í þéttbýli en hann dregur 75 km á rafhleðslunni og hámarkshraðinn er 45 km.
Citroën nefnir bílinn hins vegar Vinur, eða Ami eins og rafsnatti getur svo sem verið.
Citroën AMI er agnarsmár eða aðeins 2,41 m á lengd og 1,39 m á breidd. Hann er sérhannaður til borgaraksturs. Rafhlaðan er 5,5 kílóvattstundir og rafmótorinn 6 kílóvött. Vegur bíllinn aðeins 420 kg. Hann fullhleðst á þremur klukkustundum og ekki þarf sérstaka hleðslustöð heldur er innbyggða hleðslusnúran einfaldlega útdregin úr hurðarfalsi og stungið í samband við venjulegan tengil.