„Nýir Volvo vörubílar seljast eins og heitar lummur þessa dagana og það sem af er ári er Volvo með 31% hlutdeild af seldum vörubílum yfir 10 tonn.“
Þannig segir í tilkynningu frá Brimborg, umboði fyrir Volvobíla á Íslandi.
Volvo FH16 er mest selda einstaka gerð vörubíla á Íslandi. Hefur Veltir afhent 18 vörubíla yfir 10 tonnum á árinu sem er 31,0% hlutdeild í vörubílamarkaði og 125% söluaukning frá fyrra ári.
Heildarmarkaður fyrir vörubíla yfir 10 tonn fyrstu sex mánuði ársins er 58 bílar og er það aukning frá sama tíma í fyrra um 20,8%.
„Efnahagslífið er að taka mjög hressilega við sér sem er að skila sér í mikilli aukningu á eftirspurn eftir atvinnubílum og atvinnutækjum. Það hefur leitt til þess að pantanastaða Veltis fyrir nýja atvinnubíla og atvinnutæki er mjög sterk sem mun tryggja umtalsverðan vöxt einnig á seinni hluta ársins,“ segir Marteinn Jónsson, framkvæmdarstjóri Veltis.