Brasilíska fyrirsætan Gisele Bündchen greindi frá stórhættulegri lífsreynslu á Íslandi í sjónvarpsþætti Jimmy Fallon, The Tonight Show, síðastliðinn fimmtudag.
Jimmy Fallon fékk Bündchen og fjöllistamanninn Wayne Brady til sín í þáttinn þar sem að þau spiluðu leikinn „True Confessions“ sem er þekktur liður í þætti Fallons.
Markmið leiksins er að velja á milli tveggja umslaga. Eitt inniheldur lygasögu um keppandann og hitt staðreynd. Keppandinn þarf svo að blekkja andstæðinga sína til að segja lygina vera staðreynd, eða öfugt.
Spilið sem Bündchen dró sagði hana hafa verið stadda á Íslandi í myndatöku, þar sem að hún þurfti að stilla sér upp á gerviísjaka í sjónum. Við myndatökuna á hún að hafa næstum dottið í ískaldann sjóinn.
Bündchen rifjaði upp að árið hafi verið 1997 eða 1998. Henni var stillt upp á gerviís innan um alvöru borgarísjaka.
„Ég hefði verið dauð innan örfárra sekúnda, þið vitið hvað gerist ef þú dettur í ískalt vatnið? Þú deyrð innan örfárra sekúndna!“
Fallon og Brady sögðu hana ljúga sögunni, en hún reyndist sönn. Bündchen var stödd hér á landi í myndatöku fyrir ilmvatn af nafninu Oxygène.
Hún var látin klæðast kjól og umkringd tökuliði og áhöfn í björgunarvestum og dúnúlpum.
Meðfylgjandi er myndbandið þar sem hún rekur söguna: