Venesúelamenn á Íslandi efndu til hljóðlátra mótmæla fyrir utan Hallgrímskirkju í dag vegna endurkjörs forsetans Nicolas Maduro í heimalandi þeirra.

Venesúelabúar vara við yfirvofandi fólksflutningabylgju sem gæti farið af stað í áframhaldandi valdatíð Nicolas Maduros.

Samkvæmt útgefnum niðurstöðum kosninga náði forseti landsins Maduro endurkjöri í gær, þvert á það sem útgönguspár og skoðanakannanir bentu til.

Hann hefur nú verið forseti í rúman áratug, eða frá 2013. Stefnir í að hann sitji í embætti til ársins 2031.

Frétt af mbl.is

Mótmælt í Venesúela: „Þeir stálu kosningunum“

„Venesúela þarf alþjóðlega hjálp,“ stendur ritað á plakat sem einn mótmælandi heldur uppi. „Svikari“ stendur á öðru plakati. mbl.is/Hákon

Mikill fólksflótti í valdatíð forsetans

Samkvæmt tilkynningu frá No Borders eru kröfur mótmælanna m.a að vekja athygli alþjóðasamfélagsins á „þeim hörmulegu afleiðingum sem þessar kosningar fela í sér“.

Mik­ill fólks­flótti hef­ur verið frá Venesúela í valdatíð Maduros og hafa sumir Venesúelamenn flúið alla leið til Íslands. Mótmælendurnir vara nú einnig við „yfirvofandi fólksflutningabylgju sem gæti átt sér stað“.

Rauð málnigin á höndum mótmælenda á að tákna blóð á höndum Maduros. mbl.is/Hákon

„Venesúela er ekki öruggt land“

Þess er einnig krafist að ríkisstjórn Íslands og á Norðurlöndunum gefi frá sér opinberar yfirlýsingar um niðurstöður kosninganna.

„Venesúelskir hælisleitendur hér á landi lifa í stöðugum ótta að þeim verði vísað brott til lands þar sem ekkert bíður þeirra nema dauðinn,“ skrifa No Borders.

Frétt af mbl.is

Setja spurningamerki við sigur Maduro

Rauði liturinn á einnig að tákna lögregluofbeldi sem mótmælendur í landinu eru beittir. mbl.is/Hákon

Stjórnarandstaðan hafnar niðurstöðunum

Yfir­kjör­stjórn í Venesúela gaf út að Maduro hefði fengið 51,2% greiddra at­kvæða, en keppinautur hans, Ed­mundo Gonza­lez Urrutia, hefði fengið 44,2%.

Stjórn­ar­andstaðan í landinu hafn­ar niðurstöðunum og seg­ir Urrutia vera ný­kjör­inn for­seta með 70% at­kvæða.

Fulltrúar fjölda ríkisstjórna um allan heim setja spurningamerki við kjörið og kalla eftir því að atkvæðin verði endurtalin af óháðum aðilum. Aðrir óska Maduro til hamingju.