Framsóknarflokkurinn er með 9% fylgi á landinu öllu og nær sjö þingmönnum á Alþingi samkvæmt tölum klukkan hálftvö í nótt. Flokkurinn tapar 15,4% fylgi frá síðustu kosningum og missir 12 þingmenn.
Gunnar Bragi Sveinsson nær kjöri fyrir flokkinn í Norðvesturkjördæmi og þau Sigmundur Davíð Gunnlaugsson og Þórunn Egilsdóttir í Norðausturkjördæmi.
Í Suðurkjördæmi ná Sigurður Ingi Jóhannsson forsætisráðherra og Silja Dögg Gunnarsdóttir kjöri.
Eygló Harðardóttir heldur áfram á þingi í Suðvesturkjördæmi og Lilja Dögg Alfreðsdóttir utanríkisráðherra í Reykjavík suður.
Miðað við tölurnar núna geta vinstriflokkarnir fjórir ekki myndað stjórn. Þeir myndu aðeins fá 28 þingmenn kjörna.