Innlent | mbl | 17.1.2020 | 10:25

Gera athugasemdir við öryggisáætlun Mountaineers

Hundruð björgunarsveitarmanna tóku þátt í að bjarga 39 ferðamönnum sem lentu í hrakningum við rætur Langjökuls í ferð á vegum Mountaineers 9. janúar. Ljósmynd/Katia Kuwabara

Ferðamálastofa gerði athugsemdir við einstaka þætti öryggisáætlunar ferðaþjónustufyrirtækisins Mountaineers, sem þó uppfyllir formskilyrði laga um öryggisáætlanir.

Þetta kemur fram í tilkynningu frá Ferðamálastofu. Þar segir að í kjölfar frétta af farþegum ferðaþjónustufyrirtækisins Mountaineers sem lentu í hrakningum í vélsleðaferð 7. janúar síðastliðinn hafi Ferðamálastofa óskað eftir gildandi öryggisáætlun fyrirtækisins og skýringum á tilurð atviksins.

Frétt af mbl.is

Eiga eftir að taka skýrslu af Mountaineers

Eftirliti og skoðun Ferðamálastofu beindist fyrst og fremst að öryggisáætlun vélsleðaferðarinnar, sem samkvæmt tilkynningu innihélt þá þætti sem gerður er áskilnaður um í lögum. „Það er því mat Ferðamálastofu að öryggisáætlun Mountaineers uppfylli formskilyrði 11. gr. laga um Ferðamálastofu nr. 96/2018.“

Ferðamálastofa skoðaði einnig atriði sem varða öryggisáætlanir almennt og gerði athugasemdir við að einstakir þættir öryggisáætlunar ferðaþjónustufyrirtækisins mættu vera ítarlegri og skýrari, meðal annars varðandi veðurfar og skilyrði, kynningu á öryggisreglum og -þáttum til farþega og starfsmanna, leiðarval og ytri aðstæður.

Ferðaþjónustufyrirtækinu Mountaineers hafa verið kynntar athugasemdir Ferðamálastofu og hefur því verið veittur mánaðarfrestur til úrbóta.