Katrín Jakobsdóttir forsætisráðherra og Íris Róbertsdóttir bæjarstjóri Vestmannaeyja, undirrituðu í dag viljayfirlýsingu um samvinnu vegna viðburða sem haldnir verða árið 2023 í tilefni þess að 50 ár verða liðin frá eldgosinu í Heimaey og 60 ár frá eldgosinu í Surtsey.

Þetta kemur fram í tilkynningu stjórnarráðsins.

Á stefnuskránni er að halda samnorrænan ráðherrafund forsætisráðherra í Vestmannaeyjum í nálægð við Goslokahátíðina árið 2023. Stendur þá til að halda málstofu um eldgosin sem skipulagðar verða í samvinnu við Jarðfræðifélag Íslands, fræðasamfélagið, Háskóla Íslands, Veðurstofu, almannavarnir, embætti ríkislögreglustjóra, áhugafólk og fræðamenn. Auk þess er markið sett á að reisa minnisvarða á Heimaey með vísun í eldgosin.

Er meginmarkmið viðburðanna og minnisvarðans að vekja athygli á eldgosunum og undirstrika þýðingu þeirra fyrir náttúruna og samfélagið. Framtakinu er auk þess ætlað til að kynna eldgosin fyrir ráðamönnum Norðurlandanna og þakka þeim fyrir aðstoðina sem þeir færðu Íslendingum eftir eldgosið á Heimaey.

„Ómetanleg aðstoð barst frá Norðurlöndunum við endurreisn samfélagsins að loknu eldgosinu á Heimaey. Myndarlegum fjárveitingum úr ríkissjóðum Norðurlandanna var varið til uppbyggingar í Vestmannaeyjum sem og á meginlandinu til þess að tryggja flóttafólki heimili og þjónustu. Jafnframt stóðu Norðurlöndin fyrir almennum söfnunum og fyrir það fé var m.a. hægt að byggja hjúkrunarheimilið Hraunbúðir og leikskólann Kirkjugerði í Vestmannaeyjum. Jafnframt færðu Norðurlöndin Íslendingum fjölmörg hús fyrir flóttafólkið úr Vestmannaeyjum,“ segir í tilkynningunni.

Tengdar fréttir

Surtsey

Nýr landnemi finnst í Surtsey

• Surtseyjarmálinu lokið með sekt
• Surtseyjarsjómaðurinn fæst ekki í skýrslutöku
• „Mamma heimtar að ég fari í ADHD-greiningu“
• Formleg kæra komin á borð lögreglunnar

» Fleiri tengdar fréttir

• Blogga um frétt