Minningarskjöldur um dansk-íslenska rithöfundinn Guðmund Kamban í Kaupmannahöfn hefur verið fjarlægður. Barnabarn manns sem Guðmundur er sagður hafa svikið í hendur nasista vildi láta fjarlægja skjöldinn.
Á vefnum ØsterbroLiv er haft eftir Herberth Nathan, formanni húsfélagsins á Uppsalagötu 20 þar sem skjöldurinn var, að húsfélagið hafi ekki viljað blanda sér í málið og því tekið niður skjöldinn áður en aðrir myndu gera það.
Skjöldurinn var settur upp 27. júní árið 1990 og stóðu hjónin Helgi Skúlason og Helga Bachmann að uppsetningu hans, en móðir Helgu var systir Guðmundar.
Í sumar barst hins vegar sú krafa að láta fjarlægja skjöldinn vegna tengsla Guðmundar við nasista.