Óvenju sterkur skjálfti varð undir Mýrdalsjökli í norðausturrima öskju Kötlu, klukkan 19.10 í kvöld. Fannst hann meðal annars í Skaftártungum.
Mældist hann 4 að stærð.
Fleiri skjálftar hafa fylgt í kjölfarið, þar af einn af stærðinni 3,4 að mati Veðurstofunnar.
Ekki hefur stærri skjálfti mælst í Kötlu frá árinu 2017. Skjálftar af svipaðri stærð urðu einnig árin 2012 og 2016.
Engin merki eru um gosóróa en fylgst verður með mælingum á því vatni sem flæðir undan jöklinum, að sögn Einars Hjörleifssonar náttúruvársérfræðings á Veðurstofunni.
„Við erum með vatnamæla og skjálftamæla umhverfis Mýrdalsjökul og munum fylgjast vel með stöðunni í nótt,“ segir Einar.