Dómsuppsaga í stóra kókaínmálinu svokallaða er komin á dagskrá Héraðsdóms Reykjavíkur, en hún verður klukkan 10 á morgun.
Málið er stærsta kókaínmál sem komið hefur upp hér á landi, en í málinu eru fjórir menn ákærðir fyrir að hafa, ásamt óþekktum aðila, ætlað að flytja inn 99,25 kíló af kókaíni hingað til lands frá Brasilíu með viðkomu í Hollandi, þar sem fíkniefnin voru haldlögð af yfirvöldum. Efnin voru falin í sjö trjádrumbum.
Páll Jónsson, Daði Björnsson, Jóhannes Páll Durr og Birgir Halldórsson eru allir ákærðir fyrir skipulagða brotastarfsemi, tilraun til stórfellds fíkniefnalagabrots og hafa haft umtalsverðar óútskýrðar tekjur sem talið er að þeir hafi aflað sem ávinnings af refsiverðum brotum. Eru upphæðirnar frá 13 og upp í 17 milljónir á hvern einstakling, samtals 63 milljónir.
Saksóknari fór fram á hámarksrefsingu í málinu, en Anna Barbara Andradóttir, saksóknari við embætti héraðssaksóknara, sagði í málflutningi sínum að það væri dómsins að meta refsingu, en hún vísaði til fyrri dóma, meðal annars 12 ára dóms í saltdreifaramálinu svokallaða.
Í því máli voru þrír menn fundnir sekir fyrir að hafa staðið að innflutningi á saltdreifara hingað til lands með Norrænu frá Hollandi. Í honum voru faldir 53 lítrar af amfetamínvökva. Í samvinnu við óþekktan íslenskan aðila fjarlægðu þeir amfetamínvökvann úr saltdreifaranum og framleiddu allt að 117,5 kg af amfetamíni í sölu og dreifingarskyni.
Á morgun verða fjórar vikur frá því að aðalmeðferð málsins lauk, en það vakti talsverða athygli hversu löng aðalmeðferðin var. Helgaðist það meðal annars af því að erfiðlega gekk að taka skýrslu af hollenskum lögreglumönnum og töfðust skýrslutökur um rúmlega sex vikur vegna þessa.
Þá vakti það athygli að dómari í málinu bannaði fjölmiðlum við upphaf aðalmeðferðar að greina frá því sem kæmi fram í skýrslutökum fyrr en þeim væri að fullu lokið. Eftir því sem málið tafðist kom fram aukin gagnrýni á þetta fyrirkomulag og endaði Vísir með að birta fréttir sínar úr dómsal áður en skýrslutaka kláraðist. Var það að lokum niðurstaða dómarans að aðhafast ekkert vegna þess.