Gosið hefur „mikið auglýsingagildi“
Setja bókamerki
Ferðamálastjóri segir að eldgosið við Litla-Hrút muni hafa lítil áhrif á ferðamennsku hér á landi í sumar, þar sem erfitt er fyrir ferðamenn að finna flug og gistingu á þessum tíma árs. En ef gosið heldur áfram inn í haustið sé líklegt að fjöldi ferðamanna aukist.
„Svona viðburður hefur mikið auglýsingagildi,“ segir Arnar Már Ólafsson ferðamálastjóri í samtali við mbl.is. „Ég held að á allra næstunni mun þetta ekki hafa mikil áhrif á fjölda ferðamanna á Íslandi, en þegar við horfum fram í tímann getur þetta skipt máli.“
Myndi hafa áhrif í haust
„Nú vitum við ekkert hvernig þessu gosi vindur fram en ef þetta heldur áfram inn í haustið og veturinn þá er ekki ólíklegt að þetta stuðli að því að fjöldi ferðamanna verður meiri en við áttum von á,“ segir Arnar.
Hann segir hins vegar að gosið muni hafa lítil áhrif á fjölda ferðamanna í sumar enda flest hótelherbergi uppbókuð.
„Það er ósköp fyrir ferðamenn að finna flug og gistingu á þessum tíma.“
Í takt við þá ímynd sem við viljum
Eldgosið við Litla-Hrút er þegar farið að vekja athygli út fyrir landsteinana. Fjölmargir erlendir fréttamiðlar hafa greint frá gosinu. Arnar segir að slíkur viðburður rími við þá ímynd sem Íslendingar vilji skapa um landið.
„Þessi viðburður er í rauninni einstakur. Þetta hefur hlotið talsverða umfjöllun vítt og breitt um heiminn nú þegar,“ segir hann. „Ísland er í umræðunni og áminning um Ísland sem áfangastað fyrir ferðamenn.
„Þetta hangir allt saman. Sú ímynd sem eldgos skapar er í takt við þá ímynd sem við viljum skapa okkur sem áfangastaður,“ segir Arnar að lokum.
Beint flug til Kína styrkir útflutning
Kostnaður meira en 100-faldast
Sundagöng koma einnig til greina
Beitti piparúða og kylfu – Tveir á slysadeild
Um 60 skjálftar í kvikuganginum
Fræsa og malbika Reykjanesbraut