Samfylkingin hefur sett fram þrjár grundvallarkröfur til næstu ríkisstjórnar, sem flokkurinn vill veita forystu, og aðgerðir til árangurs.
Fyrsta krafan, sem snýr að framförum í orkumálum, felur í sér tíu ára markmið um að auka ársframleiðslu á raforku um 5 TWh.
„Með bættri orkunýtni má fá allt að 1 TWh á sama tíma. Þannig getum við staðið undir góðum gangi í orkuskiptum á landi og hafi árið 2035, vexti til heimila og smærri fyrirtækja í takti við fólksfjölgun og hóflegri aukningu til núverandi og nýrra stórnotenda (svo sem til landeldis og gagnavera),” segir í tilkynningu en blaðamannafundur hófst klukkan 11 í morgun við félagsheimilið í Árnesi í Skeiða- og Gnúpverjahreppi þar sem útspil flokksins var kynnt.
„Samfylkingin er staðráðin í að rjúfa framkvæmdastoppið frá 2017 sem birtist meðal annars í því að í tíð núverandi ríkisstjórnar hafa framkvæmdir hafist við 0 við jarðgöng og 0 nýjar virkjanir yfir 10 MW – hvort sem litið er til virkjana sem nýta vatnsafl, jarðvarma, vind eða aðra orkugjafa,“ segir Kristrún Frostadóttir í tilkynningunni.
Krafist er nýrrar byggðalínu fyrir árið 2035 og að útrýma skuli einföldum tengingum við þéttbýlisstaði.
Hvað framfarir í samgöngumálum snertir leggur Samfylkingin fram þá kröfu að fjárfestingar í samgöngum fari aftur upp í meðaltal OECD-ríkja fyrir árið 2030 (sem er um 1% af vergri landsframleiðslu).
Lagt er til að alltaf verði framkvæmdir við ein til tvenn jarðgöng í gangi á hverjum tíma og að Strætó verði styrktur á meðan framkvæmdir standa yfir við borgarlínu.
Önnur krafa Samfylkingarinnar snýr að skynsemi í auðlindastefnu. Farið er fram á að almenn auðlindagjöld frá fyrsta kjörtímabili renni til nærsamfélags og þjóðar.
„Í fyrstu verði tekin upp skynsamleg og réttlát auðlindagjöld í sjávarútvegi, fiskeldi, orkuvinnslu og ferðaþjónustu. Auðlindastefna sem skapar ramma fyrir vöxt og verðmætasköpun um land allt,” segir í tilkynningunni.
Lagt er m.a. til að veiðigjald í sjávarútvegi verði hækkað með þrepaskiptingu til að sporna við frekari samþjöppun. Auðlindagjald verði rukkað fyrir aðgang ferðamanna að náttúruperlum Íslands og að stjórn verði komið á Airbnb.
Þriðja grundvallarkrafa flokksins snýst um íslensk kjör og atvinnustefnu fyrir Ísland.
Lagt er til að framleiðni í hagkerfinu verði aukin og að hart verði tekið á félagslegum undirboðum og hvatt til beins ráðningarsambands. Einnig að Ísland gæti hagsmuna sinna innan Evrópska efnahagssvæðisins
„Höldum sérstöðu landsins á lofti þar sem nauðsyn krefur í viðræðum innan EES. Horfa þarf til smæðar og fjarlægðar frá helstu viðskiptalöndum – styrkja verður stjórnsýsluna svo hún ráði við verkefnið,” segir í tilkynningunni.