Margrét Lára Viðarsdóttir telur ákvörðun Mikel Arteta, knattspyrnustjóra karlaliðs Arsenal, að hafa tekið fyrirliðann Martin Ödegaard af velli furðulega. 

Margrét Lára var gestur Harðar Magnússonar í Vellinum á Símanum sport ásamt Eið Smára Guðjohnsen í gærkvöldi en þau ræddu 16. umferð ensku úrvalsdeildarinnar í knattspyrnu. 

Arsenal gerði markalaust jafntefli á heimavelli gegn Everton en um miðjan síðari hálfleikinn tók Arteta Ödegaard af velli. 

„Ég furða mig mjög mikið á því að Arteta tekur Ödegaard af velli. Mér fannst það ofboðslega furðuleg ákvörðun. 

Sér í lagi þar sem Ödegaard var maðurinn sem var að skapa og koma sér í færi, þó hann hafi ekki verið að klára þau,“ sagði Margrét Lára meðal annars en umræðuna í heild sinni má sjá í spilaranum hér að ofan.