Tottenham og Chelsea mættust í frábærum sjö marka leik í Lundúnum í ensku úrvalsdeild karla í knattspyrnu í kvöld sem endaði 4:3 fyrir Chelsea eftir magnaða endurkomu.
Marc Cucurella, varnarmaður Chelsea, rann tvisvar sinnum í upphafi leiks og Tottenham-menn refsuðu honum í bæði skiptin með marki.
Staðan var 2:0 eftir aðeins 11 mínútur en Jadon Sancho minnkaði muninn í 2:1.
Cole Palmer jafnaði metin í 2:2 með vítaspyrnu og Enzo Fernández skoraði glæsilegt mark sem kom Chelsea yfir í 3:2.
Chelsea fékk aftur vítaspyrnu og Palmer fór aftur á punktinn og skoraði þá með því að vippa boltanum á mitt markið.
Heung-Min Son skoraði svo þriðja mark Tottenham eftir hornspyrnu.
Mörkin og helstu atvik má sjá í myndskeiðinu en mbl.is sýnir efni úr enska fótboltanum í samvinnu við Símann Sport.
