Mjög misjafn gangur er í laxveiðiám fyrri hluta sumars. Vopnafjarðarárnar skila mun betri veiði en í fyrra en annað er upp á teningnum í Húnavatnssýslum. Þannig voru komnir um 220 laxar úr Selá í Vopnafirði, sem er mun betra en í fyrra. Sömu sögu er að segja úr Hofsá en þar höfðu veiðst 150 laxar í gær. Er þetta mun betri veiði en í fyrra. Rétt er þó að hafa í huga að síðasta ár var mjög slakt í Vopnafirði.
Í Víðidalsá og Vatnsdalsá eru komnir á land 150 og 160 laxar. Það er töluvert undir því sem var á sama tíma í fyrra. Smálaxinn skilar sér ekki í því magni sem vonast var til en það getur enn breyst.
Miðfjarðará er í sérflokki og eins og fyrri ár langt á undan öllum nágrönnum sínum. Í frétt hér á Sporðaköstum fyrr í dag var sagt frá því að gærdagurinn skilaði 73 löxum í Miðfirði. Þar er nú veitt á tíu stangir þannig að meðaltalið gefur sjö laxa á stöng. Víðidalur og Vatnsdalur eru að berjast við að ná einum laxi á stöng á dag.
Veiði í Laxá í Dölum hefur verið með ágætum og eru 200 laxar komnir í bók. Smálax og stórlax veiðist í bland. Síðustu þrír dagar í Dölunum skiluðu sextíu löxum og telst það mjög gott en þar er veitt á fjórar stangir.
Laxá í Kjós er að sama skapi að lifna vel við og hafa síðustu þrjá daga þar verið bókaðir sextíu laxar á átta stangir. Ellefu rígvænir sjóbirtingar hafa einnig komið í hollinu og er sá stærsti 84 sentímetrar.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |