Störukeppni og stórfiskar

Nú fer hver að verða síðastur að skila inn mynd í veiðimyndasamkeppni mbl.is, Veiðihornsins og Sporðakasta. Frestur til að skila inn myndum er til 1. október og eftir það mun dómnefnd skipuð valinkunnum veiðimönnum og ljósmyndurum skoða framlög sem hafa borist.

Hér eru nokkrar myndir sem sendar hafa verið til okkar. Netfangið er eggertskula@mbl.is

Fyrsta myndin er skemmtileg störukeppni hunds og ísaldarurriða. Það er Nils Folmer Jörgensen sem heldur á urriðanum sem virðist annað hvort hneykslaður eða blátt áfram argur. Hundurinn starir bara á móti og Nils fullvissaði Sporðaköst að þetta hefði allt farið vel. Urriðinn fór út í aftur og hundurinn á þurrt til eiganda síns. Þessa mynd tók Elfar Aðalsteinsson.

Skemmtilegt augnablik sem fangar stórlaxinn sem slapp. Ljósmynd/Kristmann Kristmannsson

Næsta mynd er úr Miðfirði. Hér er Jón Ásgeir Einarsson búinn að setja í svakalegan fisk í Sandgilshyl í Vesturá í Miðfirði. Myndasmiður er Kristmann Kristmannsson. Eins og Jón Ásgeir sagði í samtali við Sporðköst. „Þessi göltur sleit eftir tæplega tuttugu mínútna slagsmál. Sennilega í kringum 100 sentímetrana,“ sagði Jón Ásgeir í samtali við Sporðaköst.

Brosandi Butler með einn af stærstu fiskum Hofsár í sumar. Ljósmynd/Pétur Pétursson

Hver kannast svo ekki við hamingjusama matreiðslumanninn, Jóhann Gunnar Arnarsson eða Butlerinn eins og hann er alltaf kallaður. Pétur Pétursson leiðsögumaður frá Húsavík tók þessa mynd og hér hampar Butlerinn 97 sentímetra fiski úr Klapparhyl í Hofsá. Hann landaði líka stærsta laxi til þessa úr Selá, 101 sentímetri.

• Blogga um frétt

Seinustu hundraðkallar sumarsins