Sítrónukökur eru með því betra sem hægt er að bragða á og sú sem kennd er við Starbucks-kaffihúsakeðjuna í Bandaríkjunum þykir með eindæmum ljúffeng.
Berglind Hreiðarsdóttir á Gotteri.is bjó í Seattle í Bandaríkjunum þar sem hún fékk sér oftar en ekki sneið af hinni frægu sítrónuköku sem kallast á engilsaxnesku Lemon pound cake. Hún gerði því heiðarlega tilraun til að leika uppskriftina eftir og að hennar sögn er þetta nokkuð vel heppnað.
Sítrónukakan sem Ameríka elskar
- 3 egg
- 190 gr. sykur
- 60 gr. smjör (við stofuhita)
- 1 tsk. vanilludropar
- 2 tsk. sítrónudropar
- 3 msk. sítrónusafi
- 210 gr. hveiti
- 1 tsk. lyftiduft
- ½ tsk. matarsódi
- ½ tsk. salt
- 100 ml matarolía (ljós)
- Rifinn börkur af einni sítrónu
- Þeytið saman egg, sykur og smjör þar til létt og ljóst.
- Bætið þá vanillu- og sítrónudropum saman við ásamt sítrónusafa.
- Því næst fara þurrefnin saman við og blandað rólega saman þar til deigið verður slétt og fallegt.
- Að lokum er matarolíunni og sítrónuberkinum blandað saman við og hrært vel.
- Smyrjið formkökuform vel eða notið matarolíusprey og bakið í 170°C heitum ofni í 40-45 mínútur eða þar til prjónn kemur út með engri kökumylsnu.
Sítrónuglassúr
- 250 gr. flórsykur
- 3-4 msk. nýmjólk
- 1 tsk. sítónudropar
Blandið öllu saman í skál þar til slétt og hellið/smyrjið yfir kökuna.
mbl.is/Berglind Hreiðarsdóttir