Það hefur vonandi ekki farið framhjá neinum að matarhátíðin Matey verður haldin í Vestmannaeyjum helgina 8.-10. september. Þar taka veitingastaðir bæjarins ásamt hagsmunaaðilum sig saman og blása til allsherjarveislu þar sem sjávarfang er í forgrunni og sköpunargleðin í algleymi.
Fjölmargir gestakokkar verða á hátíðinni og þar er sjálfsagt fremstur í flokki Leif Sørensen sem alla jafna er kenndur við færeyska michelin staðinn KOKS.
Sørensen mun galdra fram girnilegar kræsingar á Slippnum þar sem Gísli Matthías Auðunnsson fer með tögl og haldir og eiga aðdáendur norrænnar matargerðar von á stórkostlegri veislu.
Hægt er að bóka borð á DineOut og ætti enginn sannur matgæðingur að láta þennan viðburð framhjá sér fara.