Mætir klukkan 04:30 í ræktina

Fólk alls staðar að úr heiminum bíður eftir því að Kryddpíurnar stígi aftur á stokk næsta sumar. Mel B ætlar að minnsta kosti að vera upp á sitt allra besta og æfir eins og vitlaus kona þessa dagana. Greindi hún frá því á Instagram að hún vakni fyrir allar aldir til þess að æfa. 

Söngkonan er með það markmið að líta út eins og á mynd sem hún birti á Instagram. Myndin er af henni sjálfri og var tekin af henni fyrir nokkrum árum.

„Æfingar og að borða rétt munar öllu, jafnvel þó svo ég þurfi að æfa klukkan 4:30 áður en ég vek krakkana mína fyrir skólann,“ viðurkenndi Mel B á Instagram. 

Segir hún hörkuna vel þess virði enda líði henni vel þegar hún finnur eitthvað breytast innra með sér. Einnig sé gott að sjá árangurinn utan frá. 

Einhver myndi segja þetta vera klikkað, að vakna um miðja nótt og æfa. Í Hollywood er þetta þó þekkt og er Mark Wahlberg líklega besta dæmið um það. Segist leikarinn venjulega vakna klukkan tvö á nóttinni til þess að fara á æfingu og spila golf áður en fjölskyldan vaknar. 

Mel B, Geri Halliwell, Emma Bunton og Mel C koma saman aftur í sumar. AFP

• Blogga um frétt