Fjölmennt var í útgáfuhófi Drápu sem fagnaði útkomu bókarinnar Veislumatur landnámsaldar eftir Kristbjörn Helga Björnsson, Úlfar Finnbjörnsson og Karl Petersson. Stórstjarnan Hera Hilmarsdóttir lét sig ekki vanta en hún mætti ásamt móður sinni Þórey Sigþórsdóttur leikkonu.

Um var að ræða sannkölluð landnámsveisla en hófið var í salnum Miðgarði á Grand Hótel Reykjavík og boðið var upp á fingramat í anda bókarinnar. Þá fengu gestir íslenskan mjöð til þess að skola kræsingunum niður og var stemmingin góð.

Í bókinni fjallar Kristbjörn um þann mat sem Íslendingar borðuðu líklega á fyrstu öldum byggðar á landinu. Úlfar meistarakokkur bætir svo um betur og hefur gert um 40 uppskriftir að mat, eingöngu úr því hráefni sem var fáanlegt á þessum tíma. Karl ljósmyndari festi svo útkomuna á filmu.