Þrír leikmenn kvennaliðs Stjörnunnar í knattspyrnu verða ekkert með á tímabilinu þar sem þær eru barnshafandi.
Fótbolti.net skýrði frá því í gær að Gunnhildur Yrsa Jónsdóttir, Ingibjörg Lúcía Ragnarsdóttir og nýsjálenska landsliðskonan Betsy Hassett séu allar með barni og taki því engan þátt á nýhöfnu tímabilinu.
Tveir leikmenn til viðbótar sem hafa leikið með Stjörnunni undanfarin ár og komu við sögu í Bestu deildinni á síðasta tímabili eru sömuleiðis fjarverandi vegna barneigna.
Þar er um að ræða Eyjakonuna margreyndu Sóleyju Guðmundsdóttur og Stjörnukonuna uppöldu Maríu Sól Jakobsdóttur sem eignaðist barn fyrr á þessu ári og gæti mögulega spilað þegar líður á tímabilið.
Samningi Sóleyjar við Stjörnuna sem átti að renna út í lok þessa árs var rift og samningur Maríu Sólar rann út í lok síðasta árs.