Knattspyrnustjóri Evrópumeistara Real Madrid, Zinedine Zidane, segir að hann muni ekki flýta sér um of að tefla Cristiano Ronaldo fram eftir meiðsli.
Ronaldo varð sem kunnugt er fyrir meiðslum í úrslitaleik Evrópumótsins í byrjun júlí þegar Portúgal varð Evrópumeistari. Síðan þá hefur hann verið í sumarleyfi.
Zidane hefur gefið það út að Ronaldo muni ekki taka þátt í Super Cup þegar Real leikur gegn Sevilla 9. ágúst. Einnig er óvíst hvort Ronaldo muni leika í 1. umferð spænsku deildarinnar 21. ágúst.
„Eins og staðan er í dag þá glímir hann enn við meiðsli,“ sagði Zidane en Real Madrid er í æfingaferð í Bandaríkjunum.
„Auðvitað vill hann koma aftur en við verðum að vera þolinmóðir og hann þarf að vera rólegur. Hann verður fljótlega með okkur í Madrid,“ bætti Zidane við.