Fyrsta verk Fabio Cannavaro, nýráðins þjálfara Udinese, verður að spila síðustu 18 mínútur leiks liðsins gegn Roma sem flautaður var af vegna veikinda Evan Ndicka leikmanns Roma. Ndicka settist í grasið um miðjan síðari hálfleik og óttast var að hann væri að fá hjartaáfall. Staðan í leiknum er 1:1.
Það hefur sennilega ekki oft komið fyrir að lið er þjálfað af tveimur mismunandi þjálfurum en það gerist í Udine í kvöld. Leikurinn var flautaður af þann 14. apríl og í millitíðinni var Gabriele Cioffi vikið frá störfum hjá Udinese. Goðsögnin Cannavaro tók við starfi hans á mánudaginn.
Reglurnar á Ítalíu heimila að liðin breyti liðum sínum óháð því hvort menn hafi verið meiddir eða í banni þegar leikurinn fór upphaflega fram að undanskildum þeim leikmönnum sem skipt hafði verið af velli þegar flautað var af.
Ndicka var fluttur á sjúkrahús þar sem kom í ljós að annað lunga hans hafði fallið saman. Hann er byrjaður að æfa á nýjan leik en ekki er talið að hann leiki í kvöld.