Kristrún Heimisdóttir og Danielle Pamela Neben eru sjálfkjörnar í stjórn HB Granda. Munu þær koma inn í stjórnina í stað Guðmundar Kristjánssonar og Rannveigar Rist sem sögðu sig bæði úr stjórninni nýverið.
Kristrún og Danielle buðu sig fram í kjöri tveggja stjórnarmanna HG Granda á hluthafafundi félagsins sem fram fer á föstudag.
Í tilkynningu HB Granda til Kauphallarinnar segir að þar sem frambjóðendur séu jafnmargir og þeir stjórnarmenn sem á að kjósa á fundinum og samsetning stjórnar fullnægir ákvæðum laga og samþykkta félagsins um kynjahlutföll er sjálfkjörið í stjórnarsætin tvö.
Danielle er viðskiptafræðingur að mennt frá McGill-háskóla í Kanada. Hún hefur ekki áður setið í stjórn HB Granda. Danielle starfar sem ráðgjafi hjá Maresías slf og Fidelio Partners í London með áherslu á ráðgjöf í fjárfestatengslum, stjórnarháttum og fyrirtækjaráðgjöf.
Kristrún er lögfræðingur. Hún hefur ekki áður setið í stjórn HB Granda. Kristrún hefur frá 2015 verið rannsóknafélagi við Columbia University Law School í New York. Hún var framkvæmdastjóri Samtaka iðnaðarins 2013-14 og lektor við Háskólann á Akureyri frá 2012 og nú gestalektor þar.
Þá var hún aðstoðarmaður efnahags- og viðskiptaráðherra 2010-2012, lögfræðilegur ráðgjafi velferðarráðherra 2009-2010 og aðstoðarmaður utanríkisráðherra 2007-2009.
Á árunum 2006-2007 starfaði hún á LEX lögmannstofu. Hún var lögfræðingur Samtaka iðnaðarins 2002-2006 og í valnefnd sigurtillögu samkeppni um byggingu tónlistahúss í Reykjavík 2005-2006.
Kristrún kenndi við Háskólann í Reykjavík og Háskólann á Bifröst og var um tíma framkvæmdastjóri ReykjavíkurAkademíunnar auk fleiri starfa.