Hefja leit að kolmunna í kvöld

Bjarni Ólafsson AK og Börkur NK munu láta úr höfn í Neskaupstað í kvöld og er ætlunin að leita að kolmunna.

„Það eru svo sem engar kolmunnafréttir sem hafa borist okkur til eyrna. Guðrún Þorkelsdóttir SU hefur verið að fá eitthvað smávegis úti í Smugu en það er eina kolmunnaskipið sem er úti núna eftir því sem ég best veit,“ segir Runólfur Runólfsson, skipstjóri á Bjarna Ólafssyni. Nauðsynlegt sé að fara út og leita, það þýði ekkert að liggja við bryggju endalaust.

„Börkur fer einnig út í kvöld og við munum væntanlega byrja að leita í Rósagarðinum. Ég hef heyrt að fleiri kolmunnaskip muni síðan láta úr höfn á næstu dögum þannig að vonandi verður unnt að leita þokkalega á líklegum svæðum,“ er haft eftir Runólfi á vef Síldarvinnslunnar.

• Blogga um frétt