Opnaði söluútibú í húsakynnum Gæslunnar
Setja bókamerki
„Reynir Brynjarsson, viðhaldsskipulagsstjóri hjá Landhelgisgæslunni, tók sig til á dögunum og opnaði lítið söluútibú Bleiku slaufunnar hjá Landhelgisgæslunni,“ segir í færlsu á Facebook-síðu Landhelgisgæslu Íslands.
Fram kemur að starfsfólk Landhelgisgæslunnar hafi ekki látið sitt eftir liggja og tók sérlega vel í framtak Reynis sem hefur þurft að venja komur sínar að undanförnu í húsnæði Krabbameinsfélagsins til að fylla á birgðirnar því salan fór fram úr björtustu vonum.
Stofnunin hefur eins og mörg fyrirtæki og stofnanir haldið bleika daginn hátíðlegan í dag og mætti starfsfólk í bleiku og gæddi sér á bleikum eftirréttum í tilefni dagsins.
Reynir lét ekki duga að selja slaufuna hjá eigin stofnun heldur leit hann einnig við hjá almannavarnadeild ríkislögreglustjóra, Neyðarlínunni, Slysavarnafélaginu Landsbjörg og Slökkviliði höfuðborgarsvæðisins, en þessir aðilar eru allir til húsa á sama stað og Landhelgisgæslan í Skógarhlíð.
„Hjarta Bleiku slaufunnar í ár er slagorðið Verum bleik – fyrir okkur öll, en það vísar til máttarins sem er fólginn í sýnilegri samstöðu. Framtak Reynis rímar sannarlega við slagorð verkefnisins. Við hjá Landhelgisgæslunni erum stolt af okkar manni fyrir þessa vasklegu framgöngu og vonum að sem flestir styðji þetta brýna verkefni Krabbameinsfélagsins,“ segir í færslunni.
„Gleymum því ekki að okkar vali fylgir ábyrgð“
Vannýtt alþjóðleg tækifæri í heilbrigðiskerfinu
„4-5% gólf sem við verðum bara að brjótast í gegnum“
Vill ekki „aumingjalegar“ lækkanir á röngum tíma
„Miklar líkur á rýmingu á næstu sólarhringum“
Fylgi Höllu hrundi eftir kappræðurnar
Hvernig er vitað að þessi kona átti þetta barn?