Útséð um hvalveiðar í sumar
Setja bókamerki
„Eins og staðan er núna er útséð um að hvalveiðar verði í sumar,“ segir Kristján Loftsson, framkvæmdastjóri Hvals hf., í samtali við Morgunblaðið, en fyrirtækið bíður enn eftir svörum frá matvælaráðherra við umsókn um leyfi til veiða á langreyðum, sem send var ráðuneytinu 30. janúar sl.
„Það er augljóst í mínum huga að matvælaráðuneytið, undir forystu ráðherra Vinstri-grænna, skeytir engu um niðurstöðu umboðsmanns Alþingis og heldur skipulega áfram í sinni vegferð að reyna að leggja atvinnustarfsemina af, þótt hún byggist á lögum.
Þegar ekki er á vísan að róa með útgáfu starfsleyfis er ekki hægt að ganga í mannaráðningar og kaup á aðföngum sem eru nauðsynleg forsenda þess að veiðar geti orðið, það segir sig sjálft,“ segir Kristján.
Starfsemin væri gerð óstarfhæf
Hann nefnir og að um 50 dögum eftir að umsókn var send ráðuneytinu hafi ráðuneytið loks svarað með því að óska þess að Hvalur upplýsti „hvort og þá hvernig umsækjandi fullnægir kröfum“ tiltekinna laga og reglugerða.
Jafnframt kom fram í erindi ráðuneytisins að til skoðunar væri að veita leyfi eingöngu til eins árs í senn.
Hvalur svaraði ráðuneytinu viku síðar, 21. mars, og benti m.a. á að fyrirsjáanleiki væri afar mikilvægur þegar að allri fjárfestingu kæmi, bæði í tækjum, tólum og mannafla, og að „með því að veita leyfi til eins árs í senn [væri] í reynd verið að leggja grunn að því að gera atvinnustarfsemina óstarfhæfa“.
Málið „í vinnslu“
Hvalur sendi ríkislögmanni í janúar ósk um viðræður um skaðabætur vegna hvalveiðibannsins síðasta sumar með þátttöku verkalýðsfélaga og var því svarað mánuði síðar að málið væri „í vinnslu“.
„Ég átta mig ekki á hvernig það getur tekið 100 daga að bregðast við stuttu erindi varðandi ósk um viðræður. Erindið byggist á áliti umboðsmanns sem matvælaráðherra kvaðst jú taka alvarlega. Þetta er eins og starfsleyfisumsóknin. Það er allt á sömu bókina lært,“ segir Kristján.
Fullyrðir að kindurnar beri ekki eftirlitslausar
3.800 gígawattsstundir af viðbótarorku árlega
Landrisið gæti hafa stöðvast og gosið virðist eflast
Verið að búa til „óánægju og kergju“
„Finn fyrir miklum meðbyr“
„Eigum eftir að sjá miklar sviptingar“
Óásættanlegt hversu langan tíma viðræður hafa tekið