Rex Tillerson, utanríkisráðherra Bandaríkjanna, krefst þess að Donald Trump, forseti Bandaríkjanna, leysi ágreining ríkisins við Norður-Kóreu með diplómatískum leiðum.
„Þannig verður það þar til „fyrsta sprengjan fellur,““ segir Tillerson í samtali við CNN og BBC greinir frá. Hann segir jafnframt að þær refsiaðgerðir og háttvísi sem ríki heimsins hafi sammælst um að beita Norður-Kóreu hafi sýnt áður óséða samstöðu í alþjóðasamfélaginu.
Trump sagði í síðasta mánuði að Tillerson ætti ekki að sóa tíma sínum í að leita eftir að ræða við Kim Jong-un.
Andað hefur köldu milli Tillerson og Trump en fram kom á dögunum að Tillerson hefði kallað Trump hálfvita. Talsmenn Tillersons hafa ítrekað vísað slíkum fréttum á bug og það gerði Tillerson einnig sjálfur í viðtali sínu við CNN í dag. „Ég ætla ekki að fást við það lítilvæga mál,“ segir hann.
Sjötta kjarnorkutilraun Norður-Kóreu stendur nú yfir og hefur tveimur eldflaugum verið skotið yfir Japan. Tillerson segir að Bandaríkin séu í „beinu sambandi“ við yfirvöld í Norður-Kóreu og verið sé að kanna möguleikann á viðræðum um stöðu mála.
Trump hefur, líkt og áður kom fram, hvatt Tillerson til að eyða ekki orku sinni í „eldflaugamanninn“ eins og hann kallar Kim Jong-un.
Being nice to Rocket Man hasn't worked in 25 years, why would it work now? Clinton failed, Bush failed, and Obama failed. I won't fail.
— Donald J. Trump (@realDonaldTrump) October 1, 2017
...Save your energy Rex, we'll do what has to be done!
— Donald J. Trump (@realDonaldTrump) October 1, 2017