Pompeo hefur áhyggjur af kókalaufum

Mike Pompeo, utanríkisráðherra Bandaríkjanna, hefur verulegar áhyggjur af aukinni framleiðslu kókalaufa í Kólumbíu, sem notuð eru til framleiðslu á kókaíni.

Frá þessu greindi hann í gær þegar hann ræddi við Ivan Duque, forseta Kólumbíu, en Pompeo kom þar við eftir að hafa verið viðstaddur þegar Jair Bolsonaro sór embættiseið sem forseti Brasilíu á nýársdag. Á fundinum sammæltust Pompeo og Duque um að grípa til sameiginlegra aðgerða til að minnka framleiðslu á kókalaufum um 50% fyrir árið 2023.

Nýleg skýrsla Sameinuðu þjóðanna sýnir að aldrei hefur stærra landsvæði í Kólumbíu verið nýtt fyrir ræktun kókalaufa, en áætlað er að 171 þúsund hekt­ar­ar lands séu nýtt­ir und­ir kóka­akra.

Blóðugt kókaínstríð hefur staðið yfir í landinu svo áratugum skiptir. Hvergi í heiminum er framleitt jafn mikið kókaín og hvergi í heiminum eru neytt jafn mikils kókaíns og í Bandaríkjunum. Pompeo hefur áhyggjur af ástandinu og áhrifin sem það hefur á bæði ríkin. „Við vitum að við þurfum að bregðast við til að minnka eftirspurn í okkar ríki og við munum vinna hörðum höndum að því.“

Frétt af mbl.is

Grafa upp fórnarlömb kókaínstríðsins

Duque, sem tók við embætti forseta Kólumbíu af Juan Manuel Santos í ágúst, þakkaði Pompeo fyrir stuðning Bandaríkjanna í baráttunni gegn fíkniefnum en árlega leggja Bandaríkin til um 400 milljónir dollara og er fjármagnið nýtt til að berjast gegn framleiðendum og smyglurum. Ljóst er þó að meira þarf til en aukið fjármagn til að binda enda á kókaínstríðið. Duque kynnti nýja fjögurra ára áætlun í haust þar sem hann heitir því að „raunverulegur árangur“ muni nást í baráttunni gegn fíkniefnum á næstu fjórum árum.

Hvergi í heiminum er framleitt jafn mikið kókaín og í Kólumbíu og hvergi í heiminum eru neytt jafn mikils kókaíns og í Bandaríkjunum. AFP

• Blogga um frétt