Neita því að hafa skotið á mótmælendur
Setja bókamerki
Tengdar fréttir
Íran - mótmæli gegn stjórnvöldum
Lögreglan í Teheran, höfuðborg Írans, neitar því að hafa skotið á mótmælendur í borginni í gær, en myndbönd sem birst hafa á samfélagsmiðlum sýna átök á milli lögreglu og mótmælenda og byssuhvellir virðast heyrast á þeim sumum.
Mótmælin brutust út á laugardag eftir að ríkisstjórn landsins játaði að hafa grandað flugvél frá Ukraine International Airlines fyrir mistök aðfaranótt miðvikudags í síðustu viku.
Í frétt BBC segir að fregnir hafi borist af því að fjöldi manns hafi særst þegar öryggissveitir lögreglu leystu upp mótmæli á Azadi-torgi í Teheran í gær. Byssuhvellir virðast heyrast í myndbandi sem birt er á Twitter.
Annað myndband sýnir hvernig særð kona er dregin í burtu, en samkvæmt frétt BBC öskrar fólk í myndskeiðinu að hún hafi fengið byssukúlu í fótinn.
Mótmælandi sem var á staðnum segir við BBC að fyrst hafi öryggissveitir barið á mótmælendum með kylfum og síðar dregið upp byssur og skotið inn í mannfjöldann, eftir að mótmælendur byrjuðu að kyrja harðorð slagorð gegn æðstaklerki landsins, Ali Khamenei.
Skammt er síðan að tíðindi bárust frá Íran um harkalegar aðgerðir stjórnvalda gegn mótmælendum, en í nóvembermánuði voru umfangsmikil mótmæli vegna verðhækkana á bensíni víða um landið.
Þeim var svarað af mikilli grimmd og hörku og telja sumir greinendur að jafnvel hafi stjórnvöld myrt yfir 1.000 manns í harkalegum aðgerðum til þess að kveða mótmælin niður, en erfitt hefur reynst að sannreyna þær fregnir.
Lögreglustjórinn í Teheran, Hossein Rahimi, hefur alfarið neitað því að til slíkra aðgerða hafi verið gripið nú. Hann segir að lögregla hafi mætt mótmælendum með þolinmæði og umburðarlyndi að vopni.
Tengdar fréttir
Íran - mótmæli gegn stjórnvöldum
Var engin kristnitaka árið 1000?
Fyrsti blaðamannafundurinn í heild sinni
Víkingar komnir yfir 800 milljónir í greiðslur
Funda með þingflokkum
Stormur á Þorláksmessu en víðast hvar stefnir í hvít jól
„Börn heima sem maður myndi vilja hafa í skjóli“
Bjarni: „Útilokað að þetta geti gengið upp“
