„Úkraínu er frjálst að velja“
Setja bókamerki
„Við verðum að hjálpa og styðja við Úkraínu í sumar,“ sagði Ben Wallace, varnarmálaráðherra Bretlands, á opnum fundi Varðbergs, samtaka um vestræna samvinnu og alþjóðamál á opnum fundi um blikur á lofti í Evrópu í dag.
Á fundinum fór Wallace yfir næstu skref í tengslum við stuðning við Úkraínu og sömuleiðis fjallaði hann um hver næstu skref Atlantshafsbandalagsins yrðu að vera.
„Við verðum að sjá til þess að Úkraína komist í gegnum sumarið. Við verðum að sjá til þess að Úkraína hafi sterka samningsstöðu en sé ekki í stöðu þar sem byssu sé miðað að höfði þeirra,“ sagði Wallace.
Virða verði fullveldi Úkraínu
Wallace sagði að ósk Breta væri sú að Úkraínu væri frjálst að velja. Þá sagði hann að hvað landið ákveði að gera sé þeirra ákvörðun, að þetta snúist allt um að virða fullveldi Úkraínu. „Það er ekki okkar að segja Úkraínu hvaða kjör þau eigi að semja um. Það er ekki neins lands. Úkraínu er frjálst að velja,“ sagði hann.
Í þessu samhengi talaði hann einnig um ákvörðunarrétt bæði Svíþjóðar og Finnlands og að Bretland hafi ekki sagt þeim að gerast aðilar að NATO. „Eins og við höfum alltaf sagt þá er stefna NATO sú að hurðin er opin. Fólk velur NATO, NATO velur ekki lönd.“
„Næstu skrefin verða því að vera að við styðjum við Úkraínu og við verðum að geta aðstoðað við að tefja og ýta Rússum aftur,“ sagði hann og bætti við að koma yrði í veg fyrir að Rússar snúi aftur eftir fimm ár og taki yfir meira landsvæði.
Þríþætt áætlun fyrir NATO
Þá talaði Wallace um að Atlantshafsbandalagið þyrfti þríþætta áætlun. Í fyrsta lagi þurfi bandalagið langtímaáætlun ef Rússar ætla að halda sig á núverandi braut.
Í öðru lagi þarf að veita aðildarríkjum bandalagsins frekara þanþol til að standa af sér árásir í framtíðinni og loks þurfi í þriðja lagi að veita öðrum ríkjum bandalagsins hughreystingu.
Þá bætti hann við að þanþol og hughreysting þyrfti ekki að vera það sama.
Gígbarmurinn hækkað frá því í gær
Banna mengandi búnað sem leyfður er á Íslandi
Telur forsendur fyrir vaxtalækkun
„Það þarf að vinna mikinn fjölda upp“
Shakespeare fannst í skókassa
Skemmtiferðaskip hætt komið nærri Viðey
Skar höfuðleðrið af íslenskri konu